دنیا بھر میں ہر سال 14 نومبر کو ذیابیطس کا عالمی دن منایا جاتا ہے۔ اس دن کا مقصد عوام میں شوگر کے مرض سے متعلق شعور بیدار کرنا، اس کی وجوہات، علامات، پیچیدگیوں، علاج اور بچاؤ کے طریقوں سے آگاہی فراہم کرنا ہے۔ یہ تاریخ ایک عظیم طبی سائنس دان سر فریڈرک بینٹنگ کا یوم پیدائش بھی ہے، جنہوں نے اپنے ساتھی چارلس بیسٹ کے ساتھ مل کر انسولین کی دریافت میں بنیادی کردار ادا کیا۔ ان کی اس عظیم کاوش نے ذیابیطس کے مریضوں کے لیے زندگی کی نئی امید پیدا کی۔ 14 نومبر کو ان کی خدمات کو خراج تحسین بھی پیش کیا جاتا ہے۔ عالمی یومِ ذیابیطس کا آغاز 1991ء میں عالمی ادارۂ صحت اور انٹرنیشنل ڈائیبیٹیز فیڈریشن نے کیا، جب کہ 2006ء میں اقوام متحدہ نے اسے باضابطہ عالمی دن قرار دیا۔
ذیابیطس کوئی جدید بیماری نہیں بلکہ اس کی تاریخ ہزاروں سال پرانی ہے۔ قدیم مصری طبی دستاویزات، خصوصاً ایبرس پیپرس، میں تقریباً 1550 قبل مسیح میں ایسی بیماری کا ذکر ملتا ہے جس میں مریض کو بار بار پیشاب آنے اور شدید پیاس لگنے کی شکایت ہوتی تھی۔ بعدازاں یونانی اور ہندوستانی طبی ماہرین نے بھی اس مرض کا مشاہدہ کیا۔ تاہم انسولین کی دریافت سے پہلے ذیابیطس بالخصوص شدید نوعیت کے مریضوں کے لیے جان لیوا ثابت ہوتی تھی۔ 1922ء میں انسولین کے کامیاب طبی استعمال نے اس بیماری کے علاج میں ایک انقلابی تبدیلی پیدا کی۔آج ذیابیطس دنیا کے بڑے طبی مسائل میں شامل ہے۔ انٹرنیشنل ڈائیبیٹیز فیڈریشن کی 2025ء کی رپورٹ کے مطابق دنیا بھر میں 20 سے 79 سال کی عمر کے تقریباً 58 کروڑ 90 لاکھ افراد اس مرض میں مبتلا ہیں۔ تشویش ناک پہلو یہ ہے کہ ان میں تقریباً 25 کروڑ 20 لاکھ افراد ایسے ہیں جنہیں اپنی بیماری کا علم ہی نہیں۔ یہ لاعلمی انہیں دل، گردوں، آنکھوں اور اعصابی نظام کی پیچیدگیوں کے خطرے سے دوچار کر دیتی ہے۔پاکستان میں صورت حال مزید تشویش ناک ہے۔ ذیابیطس کے عالمی ادارے کے تازہ تخمینوں کے مطابق 2024ء میں پاکستان میں 20 سے 79 سال کی عمر کے تقریباً 3 کروڑ 45 لاکھ افراد شوگر کے مرض میں مبتلا تھے۔ مریضوں کی مجموعی تعداد کے اعتبار سے پاکستان دنیا میں چوتھے نمبر پر ہے، جبکہ بالغ آبادی میں بیماری کی شرح تقریباً 31.4 فیصد ہے، جو دنیا میں بلند ترین شرح ہے۔ اس کا مطلب ہے کہ پاکستان میں تقریباً ہر تین بالغ افراد میں سے ایک ذیابیطس کا شکار ہے۔ذیابیطس کی دو بنیادی اقسام ہیں۔ پہلی قسم میں جسم انسولین پیدا نہیں کر پاتا اور مریض کو انسولین کی ضرورت ہوتی ہے، جبکہ دوسری قسم میں جسم انسولین کو مؤثر طریقے سے استعمال نہیں کر پاتا۔ موٹاپا، جسمانی سرگرمیوں کی کمی، غیر متوازن خوراک، میٹھے مشروبات کا زیادہ استعمال، خاندانی رجحان اور بڑھتی عمر اس مرض کے اہم خطراتی عوامل ہیں۔ مسلسل پیاس، بار بار پیشاب، غیر معمولی بھوک، تھکاوٹ، وزن میں غیر ارادی کمی اور زخموں کا دیر سے بھرنا اس کی ممکنہ علامات ہیں۔ تاہم بعض افراد میں کوئی واضح علامت ظاہر نہیں ہوتی، اس لیے بروقت خون میں شوگر کی جانچ ضروری ہے۔ذیابیطس سے بچاؤ کے لیے متوازن غذا، سبزیوں اور پھلوں کا مناسب استعمال، میٹھے مشروبات اور اضافی چینی سے پرہیز، روزانہ کم از کم 30 منٹ چہل قدمی، وزن کو قابو میں رکھنا اور باقاعدہ طبی معائنہ بنیادی اہمیت رکھتے ہیں۔ دوسری قسم کی ذیابیطس کے خطرے کو صحت مند طرزِ زندگی سے کم کیا جا سکتا ہے، تاہم پہلی قسم کی ذیابیطس کو فی الحال طرزِ زندگی کی تبدیلیوں سے روکا نہیں جا سکتا۔ پہلے سے متاثرہ افراد کے لیے ڈاکٹر کی ہدایات کے مطابق ادویات، انسولین اور شوگر کی باقاعدہ نگرانی ضروری ہے۔اس عالمی دن کے موقع پر دنیا بھر میں مفت طبی کیمپ، شوگر ٹیسٹ، آگاہی سیمینار، واکس، تعلیمی نشستیں اور عوامی مہمات منعقد کی جاتی ہیں۔ نیلے دائرے کو ذیابیطس سے آگاہی کی عالمی علامت کے طور پر استعمال کیا جاتا ہے۔ پاکستان میں بھی سرکاری و نجی ہسپتالوں، طبی اداروں، تعلیمی تنظیموں اور سماجی کارکنوں کو ایسی سرگرمیوں میں بھرپور حصہ لینا چاہیے۔ذیابیطس کا عالمی دن محض ایک رسمی تقریب نہیں بلکہ ہمیں اپنی صحت، خوراک اور روزمرہ معمولات پر نظرثانی کا پیغام دیتا ہے۔ حکومت کو بنیادی مراکز صحت میں مفت اسکریننگ، سستی ادویات اور انسولین کی دستیابی یقینی بنانی چاہیے۔ عوام کو بھی یہ سمجھنا ہوگا کہ شوگر لاعلاج سمجھ کر مایوس ہونے کی نہیں بلکہ احتیاط، بروقت تشخیص اور مستقل علاج سے قابو میں رکھنے کی بیماری ہے۔ یاد رکھیے، بیماری سے آگاہی ہی اس کے خلاف پہلی کامیابی ہے۔
